童顏懼雨

好開心呀!巴塞嬴第一場!

2006年02月23日

不枉我捱眼瞓,半夜捧場,不負所託,車仔伏法於巴塞,二比一! 巴塞呢排輸兩場波,平唔到連勝紀錄,真可惜….正好用呢場世紀超硬仗祭一祭旗,振一振聲威!!!

***

不過過程都幾驚途駭浪喎又,先一開下半場俾敗家仔莫逹(Motta)擺個老烏,失一球;攪到一眾巴迷同教練列卡特個心都跌哂落嚟

,咬牙切齒真係想劈死個粉腸莫逹…因為車仔防守好堅,hold波穩又狠,要打逆境波追番平比先開紀錄更難….不過無獨有偶,車仔亦有個敗家隊長泰利擺個更靚嘅老烏,攪到施治’攤’盡都揩唔到波皮,還番個大禮俾巴塞,謝謝(國語),yes

! 之後巴塞信心嚟番哂,攻勢如虎,射門頻度,精度同威脅性都好高,攪到車仔好驚青….終於皇天不負有心人,喺新球王細哨策劃快攻下,由新一屆非洲足球先生Eto’o一頭破網! Gooooooal

!!!!! 摩連奴當堂包公上身,同隔離坐嘅列卡特手舞蹈成隻馬蹓咁成個對比….哈哈….列卡特陰陰咀笑因為下場做東作主,呢家作客都入兩球,佔盡優勢….入到自己更衣室實大聲怪叫,走埋過去車仔更衣室咀亞泰利隊長……哈哈…..兩個教練都好有大將之風,好型!冧死! 全場最生猛最矚目非阿根廷超星十九歳嘅美斯(Messi),表現落力又搏(好似餓咗好耐波咁款),速度快,有腳法(靠佢先攪到車仔其中一個後防紅牌亞姑出場),振翅高飛,指日可待.

***

好明顯以波論波,巴塞進攻同hold波率都比車仔優勝…..冇咗古利同沙維呢兩個咁有斤両嘅主力,都踢得咁出色,仲要喺個難得一見又濕又爛到離哂譜嘅球場作客,都有咁表現,掂

! 我愛車仔,但更愛巴塞,嘻

…

***

不過呢家我好zzzzzzzzzZZZZZ……………………….巴塞好嘢! 細哨好波!(發開口夢)

Posted in: 日記, 運動, 生活 |
回應(2) | 回應的RSS | 暫時未有引用通告| (0)

爸爸

2006年02月21日

昨天收到了一位摯友的通知,他的七十二歲父親因肺癌剛剛過身了.雖不算太突然,但腦裡混亂了一陣子,心裡很不安…可幸是他眼見兒孫滿堂,心裡願償,去得安詳. 小時候常到他家玩耍,世伯知我窮對我很好,我到現在都很多謝他,心存感激. 希望他在天之靈,能得到安息.

想起如果家父在世,也有這把年紀了. 他死時,我只有六,七歳. 對他的印象開始有點模糊,他的聲線也僅僅記得而已. 也許那時自己太少,斗大的腦袋那來放得許多的記憶? 介乎在似懂非懂之間,想哭又不能即哭,要培養情緒才知道,悲從何來…….如今想來,其可悲乎!? 豈不悲哉!?

一想到今天的我,畢竟未能成大器成大材,心裡有點慚愧….心頭一緊,雙眼視線模糊扭曲,悵然俯首…

Posted in: 隨心, 家庭, 日記 |
回應(9) | 回應的RSS | 暫時未有引用通告| (0)

BitterSweet

2006年02月20日

在昏亂的塵市中,繁瑣雜事裡,要應付無休止的工作,要處理敏感的人事,就像是對自己作戰. 試偷空想想,有那些事情最令人暢快?….

….是歸途中看見初生顫抖的小貓咪向你叫呼?….是懶洋洋靜悄悄地呆躺著望天花?….

….是霧雨早晨時吞吐的一口清新濕潤空氣?….是炎炎夏夜中的一陣微風吹拂?….

….是秋意濃濃的黃昏下,輕拖著至愛的手? ….是冬日中,陽光乍現的温暖?….

….是月色下與久別重逢的摰友談心?….是昏昏欲睡之際傳來的啡咖香氣? ….

….是午後悠閒地呷的一口紅茶?….是聞到花店飄來的一陣冰冷百合花香?….

….是情人突然俯身的一吻?….是放目遠望大海的盡處,赤腳感受細沙的微温?….

….是漆黑虛空裡,瞥見群星閃爍或一火燭光?….是在某處聽見己遺忘的心愛老歌或吃上一口兒時的小食?….

如果這一刻,您感到憂愁,感到困倦,感到顧慮,感到不安,或者掙扎在無數的决擇當中;請閉目….給自己數分鐘時間的鬆弛,在自我的心靈田園上,放開懷抱,寧靜中幻想或回想,最令自己愜意的片段或老舊事………讓自己在難過疲憊與無奈苦澀的情緒中,沁進了一絲絲的清甜甘美; 苦頭到最後也許避不免了擋不住,但也至少,給自己在精神上帶點好受,在消極中積極的為自己添些苦裡甜,bittersweet.

Posted in: 日記, 生活, 隨心 |
回應(2) | 回應的RSS | 引用通告(1)| (0)

一分鐘內免費任攞

2006年02月17日

細細個睇四三零穿梭機(or跳飛機?),有一個環節仲好睇過卡通片,勁有吸引力:就係喺間玩具店一分鐘內免費任攞玩具. 嗰間玩具舖係喺以前尖沙咀海運大厦嘅Peter Pan(已摺).

***

每個星期某日,一到呢個環節,所有公仔箱面前嘅o靚仔o靚妹就同啲參賽者一樣,情緒繃緊,緊握雙拳,一臉渴望…..多數參賽啲o靚仔都係一身勁裝,喺鏡頭面前少少怕怕醜醜,其實就’射喱眼’’夾’住舖頭啲玩具,個腦盤算住拎自己鍾意嗰樣先,抑或一湧而上,見嘢就掃….個主持又多數唔多生銹東問西問’阿xyz小朋友,緊唔緊張呀?’’阿xyz小朋友,開唔開心呀?清唔清楚點玩法呀?’……啲o靚仔啞哂,面紅紅咁一味點頭,其實佢哋嗰一刻已經如箭在弦,不得不發,個心卟卟跳,有啲更雙膝內曲,緊張到尿急,如果個主持再問多兩句癈問題折磨一下,隨時’瀨’得!

雞聲一响,由於啲o靚仔体內腎上腺素劇昇闗係,個個都似俾滾水淥,雞咁腳,以平時上體育堂都跑得冇咁快嘅速度楂住o架手推車,搏咗條小命衝’恒’佢,一招羅通掃北,見乜’立’乜,唔理玩唔玩得,分分鐘連靚sales姐姐都成件拎起掉入o架車….又唔知由邊處嚟’老連’咁大力,托起啲仲高過佢哋嘅大公仔,大大盒lego,眼都唔眨,氣又唔喘一下,狼過搶包山….嗰個情景就似打緊仗,成地嘢玩;有次個女主持見到個o靚仔搶到連白鞋都甩埋,喺旁邊講:’阿xyz小朋友,著番隻鞋先啦…’…莫講話鞋,就算褲都甩鬼埋雷劈又如何,老虎蟹都唔理,梗係’立’飽先啦,成世仔可能得一次咁大把機會….….好嘞,倒數最後十秒,o架車已經爆哂倉,啲o靚仔就豁出最後氣力夾硬都要有咁多塞咁多入去,連包裝都裂埋,差啲想連自己都塞埋入去咁滯….結束,o靚仔連埋o架車衝返終點,因為過度興奮,差啲成車剷埋去個主持同個鏡頭…..佢哋頭髮蓬鬆,汗如漿出,喘哂氣吹哂雞,雙頰通紅,叉哂腰,扮哂蝦公,好似來回跑完幾次渣打馬拉松咁款,身心俱疲但目光烱烱,仍然眼惊惊望住成車玩具,聽見主持問啲癈問題都係依舊做 yesman. 我估咁滿足嘅嗰一刻,仲開心過考第一,老豆姓乜都唔知,乜都聽唔入耳…..如果主持同啲o靚仔講話’其實呢個遊戲係玩吓嘅唧,全部玩具留番底’,佢哋會咬人都似,永世絶交,’以後唔啋你’…

而我哋電視機前嘅細路,都好似參咗賽一樣,緊張到有啲虛脫…完咗見到啲參賽o靚仔勁攞啲超合金呀,lego呀(尤其係大城堡海盗船),大大件遙控車,眼紅紅既羨且妬,不斷咆哮…..撐大個口得O….想即刻騎劫個參賽者….但見到啲o靚仔冇咁醒目,拎埋哂啲cheap嘢,先嚟嘲笑一番,再懶得戚專家咁款話:’咁’楂’o架,梗係唔攞呢啲呢啲啦,俾我就會咁咁咁咁,然後就咁咁咁咁吖嘛…咁都唔識’…但係可能真係到佢哋嘅時候,分分鐘拎得個barbie 頭…….學陶傑話齋:’嗱,呢啲就係阿Q精神嘞’…

***

實在唔知邊位人兄咁有諗頭攪啲咁有建設嘅項目,令一眾細路(可能包括大人)流哂口水兼喺電視機前目瞪口呆. 又學陶傑話齋:’嗱,呢啲呢,就係揭露咗人性嘅陰暗一面嘞…’ 即係貪!不過人皆有之,唔係神嘛…細細個頭腦簡單,梗唔會明點解有舖頭咁笨任俾人攞野咁’蝕’啦;到大個咗,個頭腦都係一樣咁簡單,都唔係好明,只知啲舖頭咁玩法同賣廣告套餐差唔多價錢,廣告成效更好云云…

嗰時我都醒目試過每期記幾封信去睇吓抽唔抽得中(咁細個已經咁狡猾)….哈哈….結果?…………..如果中咗就唔洗今日喺度寫篇咁嘢呻啦…..嗚嗚….

Posted in: 隨心, 遊戲, 日記 |
回應(7) | 回應的RSS | 暫時未有引用通告| (0)

是日佳曲分享

2006年02月15日

也許
曲：鮑比達　詞：林振強　編曲：鮑比達

懶懶風扇不經意地打轉，風輕也軟，像我舊記憶一串。

沒有太刻意追憶往日的你，你卻飄至，在心中打轉……。
＊
我再跟你披起往事千串，飄得遠遠，沒有辦法算出多遠；
但你，我不見，匆匆已十多季，我怎麼會仍隱隱依戀？
＊
也許當天的痴未完，想講的講未完，曾被迫吹熄的火，
也許未全熄去，仍溫暖。也許所戀的戀未完，
惟盪進淡淡記憶中，不捨去，在打轉、在轉……。（也許轉……。）

***

這是一首八十年代初的歌.

平淡的旋律加簡單的詞,就構成了一首未至於大紅但很易會啷啷上口的慢板好歌.鮑比達的編曲相當大師級和高水準(八九十年代的主要編曲家),而林振強的詞不須多說,就如他的名字,’強’.沒有什麼深奧的詞藻,用的只是你我也懂的中文字句,但寫出來的卻是充滿意境,’要’心’要’肺的情懷. 由一個近鏡’視覺’看得見的打轉風扇,到’感覺’風的吹動,然後’思想’上牽起思憶串串,再以未熄的火種去暗喻對愛戀的不捨不依,層次有序,像電影的分鏡,一場場的畫面在聽者的腦海中閃現,令人共鳴.時下的所謂歌詞,我鄙視.

無論是何家勁的版本,張國榮的版本,抑或是蔡楓華的版本,我都好喜歡這首歌,因為他們都能唱出那種味道那份情結…像湖面輕輕泛起的漣漪,隨著時間,向外盪去,直至消失…曲中的淡,曲中的淺怨,曲中的無奈傷感,令人聲聲嘆息,低迴不已.

Posted in: 隨心, 音樂, 作曲填詞 |
回應(8) | 回應的RSS | 暫時未有引用通告| (0)

小玩具

2006年02月14日

這幾天心裡有點壓力,有點不快,也很納悶. 星期天的下午,陽光普照天朗氣清,卻在家裡發呆.

***

坐在書桌前,細望書架上,發現了一件小玩具. 拿上手,把發條扭盡,小心的再放回枱面,它慢慢的像搖籃般左晃右蘯,悠悠的奏出一首安眠曲’世界真細小’…..

***

簡單的旋律,我不禁跟著喃喃和出由黃霑先生譜的詞:’世界真細小小小,小得真奇妙妙妙,實在真係細世界,嬌小而妙俏…人人常歡笑不要眼淚掉…..’

***

曲罷,玩具也停了.我的心也寛了些. 如歌詞裡說,世界真的是很小,而人只是滄海一粟,恒河一沙,仿若微塵…在世也只是短短數十寒暑,何必要徒添煩惱呢….明白了少許這個大道理,再次開動這個玩具,伏在案前,閉上眼,尋醉在那個叮噹叮噹的調子裡…

***

我不是一個什麼的disney fans,但一向也好喜歡她的disney babies series. 在一次日本遊中,在銀座博品買了這個音樂盒/精品/玩具. 她是陶瓷製的(易碎,要小心拿穩),沒有電子零件,除了那個核心的發條控製音樂輸出和床的搖動. Mickey,donald duck和pluto的baby face 相當可愛和神似,我也很想睡在其中!果然童顏猶在,童心不死!

Posted in: 日記, 生活, 隨心 |
回應(6) | 回應的RSS | 暫時未有引用通告| (1)

失色

2006年02月10日

今晚聽光明頂,冇咗劉細良,只得陶傑撐,覺得有啲失色.

***

先別理劉細良係咩政治背景,為咩要走,但係佢絶對係光明頂嘅中流砥柱. 聽光明頂兩年,如果只得陶傑一支公,會冇咁耐聽. 劉細良係陶傑現今呢類時事評論嘅最好拍檔同副手.佢就得住陶傑,知道佢先至係成個節目核心,讓佢主導成個節目嘅言論,間唔中先幫口,但係唔係求其咁講啲嘢,而係好有主張同見地;佢能夠跟得住拍住得陶傑,因為佢睇過好多書同做過政治傳媒,識嘢真係唔少,意見同思考方式能夠跟住陶傑,甚至陶傑都好多時認同佢嘅觀點同睇嘢嘅角度,好難得. 要知陶傑所識所知涉獵甚廣,好多時東西文化歷史都啷啷上口,但咁多個主持唯一得劉細良即時知道陶傑講緊乜,有時仲能夠彌補到提到陶傑有唔記得嘅嘢,掂. 我估陶傑都好欣賞呢個比佢細七年嘅後生仔.

***

仲有佢嘅笑聲

,咁多個主持得佢會有啲爽朗嘅笑聲嚟緩和吓個咁硬嘅節目,佢笑起嚟都幾童真同佻皮,同陶傑係個好對比. 試過有幾次陶傑放假,佢一條友拍啲嘉賓主持,以為唔掂啦,聽落,又唔悶喎,都ok.以我意見佢一個人都可以担大旗獨立做個節目,但現時最perfect梗係佢拍陶傑啦.以前犀牛俱樂部時陶傑拍劉天賜,都冇細良拍陶傑咁掂. 有人話不如揾黃毓民拍陶傑啦,我話一定唔好.一個節目一定要得一個主導一個主角,佢兩個都有自己主見,聽得邊個吖(好似以前個龍門陣咁,嘈到拆天)? 兩個都係陽剛政論者,一定要有個冇咁搶鏡嘅副手, 一陰一陽先會有好效果.

***

今晚揾邵嘉津代細良,當堂唔掂. 唔係得罪,佢講嘢冇point,又好似冇乜料,得把聲大.而沈郁揮同往時一樣,冇嚟聲氣,開咗咪都唔知佢喺度,太沉默…我估陶傑都覺得冇咗細良喺節目,好似冇咗左右手咁,冇人跟到佢. 睇埋881903啲光明頂留言,原來好多人聽光明頂同好鍾意細良.呢家攪到我都有啲唔捨得佢,聽落個節目都唔係好慣tim,冇以往嗰種味道.