童顏懼雨

細細個睇四三零穿梭機(or跳飛機?),有一個環節仲好睇過卡通片,勁有吸引力:就係喺間玩具店一分鐘內免費任攞玩具. 嗰間玩具舖係喺以前尖沙咀海運大厦嘅Peter Pan(已摺).

***

每個星期某日,一到呢個環節,所有公仔箱面前嘅o靚仔o靚妹就同啲參賽者一樣,情緒繃緊,緊握雙拳,一臉渴望…..多數參賽啲o靚仔都係一身勁裝,喺鏡頭面前少少怕怕醜醜,其實就’射喱眼’’夾’住舖頭啲玩具,個腦盤算住拎自己鍾意嗰樣先,抑或一湧而上,見嘢就掃….個主持又多數唔多生銹東問西問’阿xyz小朋友,緊唔緊張呀?’’阿xyz小朋友,開唔開心呀?清唔清楚點玩法呀?’……啲o靚仔啞哂,面紅紅咁一味點頭,其實佢哋嗰一刻已經如箭在弦,不得不發,個心卟卟跳,有啲更雙膝內曲,緊張到尿急,如果個主持再問多兩句癈問題折磨一下,隨時’瀨’得!

雞聲一响,由於啲o靚仔体內腎上腺素劇昇闗係,個個都似俾滾水淥,雞咁腳,以平時上體育堂都跑得冇咁快嘅速度楂住o架手推車,搏咗條小命衝’恒’佢,一招羅通掃北,見乜’立’乜,唔理玩唔玩得,分分鐘連靚sales姐姐都成件拎起掉入o架車….又唔知由邊處嚟’老連’咁大力,托起啲仲高過佢哋嘅大公仔,大大盒lego,眼都唔眨,氣又唔喘一下,狼過搶包山….嗰個情景就似打緊仗,成地嘢玩;有次個女主持見到個o靚仔搶到連白鞋都甩埋,喺旁邊講:’阿xyz小朋友,著番隻鞋先啦…’…莫講話鞋,就算褲都甩鬼埋雷劈又如何,老虎蟹都唔理,梗係’立’飽先啦,成世仔可能得一次咁大把機會….….好嘞,倒數最後十秒,o架車已經爆哂倉,啲o靚仔就豁出最後氣力夾硬都要有咁多塞咁多入去,連包裝都裂埋,差啲想連自己都塞埋入去咁滯….結束,o靚仔連埋o架車衝返終點,因為過度興奮,差啲成車剷埋去個主持同個鏡頭…..佢哋頭髮蓬鬆,汗如漿出,喘哂氣吹哂雞,雙頰通紅,叉哂腰,扮哂蝦公,好似來回跑完幾次渣打馬拉松咁款,身心俱疲但目光烱烱,仍然眼惊惊望住成車玩具,聽見主持問啲癈問題都係依舊做 yesman. 我估咁滿足嘅嗰一刻,仲開心過考第一,老豆姓乜都唔知,乜都聽唔入耳…..如果主持同啲o靚仔講話’其實呢個遊戲係玩吓嘅唧,全部玩具留番底’,佢哋會咬人都似,永世絶交,’以後唔啋你’…

而我哋電視機前嘅細路,都好似參咗賽一樣,緊張到有啲虛脫…完咗見到啲參賽o靚仔勁攞啲超合金呀,lego呀(尤其係大城堡海盗船),大大件遙控車,眼紅紅既羨且妬,不斷咆哮…..撐大個口得O….想即刻騎劫個參賽者….但見到啲o靚仔冇咁醒目,拎埋哂啲cheap嘢,先嚟嘲笑一番,再懶得戚專家咁款話:’咁’楂’o架,梗係唔攞呢啲呢啲啦,俾我就會咁咁咁咁,然後就咁咁咁咁吖嘛…咁都唔識’…但係可能真係到佢哋嘅時候,分分鐘拎得個barbie 頭…….學陶傑話齋:’嗱,呢啲就係阿Q精神嘞’…

***

實在唔知邊位人兄咁有諗頭攪啲咁有建設嘅項目,令一眾細路(可能包括大人)流哂口水兼喺電視機前目瞪口呆. 又學陶傑話齋:’嗱,呢啲呢,就係揭露咗人性嘅陰暗一面嘞…’ 即係貪!不過人皆有之,唔係神嘛…細細個頭腦簡單,梗唔會明點解有舖頭咁笨任俾人攞野咁’蝕’啦;到大個咗,個頭腦都係一樣咁簡單,都唔係好明,只知啲舖頭咁玩法同賣廣告套餐差唔多價錢,廣告成效更好云云…

嗰時我都醒目試過每期記幾封信去睇吓抽唔抽得中(咁細個已經咁狡猾)….哈哈….結果?…………..如果中咗就唔洗今日喺度寫篇咁嘢呻啦…..嗚嗚….

<姻緣一線>

      元宵燈上佳節到, 月老紫霄忙線牽.

不知不覺在這裡寫了個多月BLOG,感覺很痛快. 多謝老友一支公介紹這個地方給我. 我寫BLOG的目的不是為了做日誌,而是希望有個渠道當自己一有感而發時,就能落筆寫些東西舒發舒發…..有些是寫出來告訴自己,有些是和眾網友分享的.

寫BLOG後,才發現自己時常執筆忘字,甚至錯別字多,文筆也很生疏, 要多看書和字典補救.而文思澎湃的時候卻每每是夜闌人靜的當兒.

這個BLOG就像自己的親骨肉….我所有的文篇就似賦與了’他’的性格,別人看了’他’,就像看到我. BLOG的性格 = 我的性格.由一版甚麼都沒有的BLOG, 到現在有網友肯賞面欣賞,甚至有回應,好開心又滿足.

以下是自己頗為滿意的十篇文章,給自己回顧評論:

十大必看漫畫 – 自己絶對是個漫畫迷,好久以前已好想寫出來和人分享,寫了後很滿足.

至討厭要和你手 – 哈哈,寫完都自己噗嗤笑了出來….真是蠻有趣….

蹓躂到天明 – 最滿意的作品. 一面寫一面回憶當時的情景氣氛,如櫪櫪在目. 文中提及的ALMOND餐廳現在還是許多日本人落腳和等人的地方.下次我一定要去重温重温.

冬夢 – 充滿幻想的短文.

霧早聽雨 – 第二滿意的作品. 還記得是清晨邊望著窗邊作的文章.以擬人法去幻想著小雨落下時忐忑不安的心情.

此情可待成追憶 - 在滿懷心事的情緒寫的文章. 好喜歡自己想的那個鹹柑桔比喻.

米仔蘭般的暗戀 – 好懷念那個人和那時的情懷,所以記下來.

火一般的鬥志 – 實在是近期我見過最爆笑的情侶.

童顏故事(一) – 這不是我第一次用半文言文寫故仔. 但卻是第一次自己作的警世性的故事. 最難不是用文言文寫,而是想出一個完整又有意思的故事.

小時候的遊戲 – 老餅懷舊之作.真是好想念小時的種種生活.

小時候好喜歡拜年，因為有街出，有好東西吃，有利是梪，有表兄弟姐妹陪玩，可以乘機玩他們的玩具和看他們的漫畫，鬧作一團，好不快樂．

青少年時反叛期，心理變化（唔係變態），以為自己不再是‘細路仔’，有自己主張，漸漸抗拒跟大人們四處去拜年，受親戚們的目光洗禮（即係由頭望到落腳再由腳望到上頭）和他們的喋喋不休（即係問長問短）．

出來社會做事，尚算年青，自覺已是大人，對拜年不太熱衷也變得接受．．．不過就沒有小時候那股渴望和熱情，因為自己識賺錢，不再貪人家的東西，反而是靜靜坐在一角，間中搭上一兩句話（即係俾親戚問拍拖未，幾時結婚）．

到了現在，在社會打滾都有雙位年數，人生經驗多了，可以說自己這個年紀都‘做得人老豆’，反而幾想去跟老媽子通處拜年，探探好久未見的長輩們親戚們．

前幾天跟一位看着我長大的叔叔拜年，他年青時孔武有力，強壯結實，大大隻隻,手瓜起展,食嘢唔洗俾$$；現在上身的‘一舊舊’的肌肉都昇華成了全身最強肌肉－肚腩，不提那多添的‘火車軌’，一頭染不全的白髮，昏花的老眼把我認錯做我的弟弟，一條腿也因工作壞了，行路也一拐拐，牙也‘崩’／脫落了一兩隻，笑起來漏風．．．唯一不變的是他那健談風趣爽朗的性格和関心我一家人的那份情誼；看著他，每次我都親切的擁著他，用帶著眼紅紅的笑容去歡迎他，祝福他．看見他一拐拐的背影，我的心好痛好‘o翕’．

一些平時少去探望少去拜年（都有幾年）的老親戚，每次都是由老媽子去完後報告我們他們的近况．．．今年自己多問了一句：‘現在他幾歳？’媽答：‘八張幾．都唔拜得佢哋好多次年咯．．．’原來開始意識自己老了的時候（白頭髮都標咗幾條出嚟），長輩亦會老得更快．歳月不饒人，大部分的長輩都記性差了，常常把我認錯，但一和他們談起舊日的點點滴滴，他們會好高興，反而記得以前的事更多更清晰，告訴連我都已忘記了的我小時候的事．看著他們的老態，再想起媽的說話，真是一腔惆悵，一臉茫然，百般無奈．時間可以rewind嗎？

所以這幾年過年，每每想起他們，更覺要珍惜眼前一切事和人，更珍惜與他們相處的日子．希望他們老得健康，老得快樂．