童顏懼雨

一個理想的獨處之地

2005年12月29日

好多時心情悶透,苦惱無助的時候,都極想獨處…想獨處做什麼?沒所謂,只要獨個兒離群就可以,不受任何人事干擾…

獨處的時候,好想靜,好想哼句歌,好想胡言亂語,甚至怒哮狂呼,舒解鬱結,釋發情緒…

如果有可能,一個理想的獨處之地是…

如飄零燕海狄住的那個亞爾卑斯山般,放眼滿處翠綠,滿目青天,一望空闊…背靠著如厦的大杉樹群,坐著飄著木香的小屋前,接受著和煦陽光的洗禮,吞吐間盡是清新得來自天堂的空氣…如斯仙境,獨處也是個樂!憂愁苦困?都可能被近得觸手可摘的山間悠雲通通

牽掉…

又或是…
一個陰沉的佈幕:四處是峭壁,中間是個大湖…拂著輕輕的海風,週圍都是凝著了吹不散的濃霧…天上地下,只有自己一個,坐在一瓢孤舟,點著一豆之燈…躺著卧著,任由木船隨著海浪推到那裡,就漂到那兒,岸頭無邊…聽著浪聲聽著風聲和自己的呼吸聲,好好沉思…

再或是…
如置身在文化中心的大堂裡…僅有幾對純白的亮燭照明了密封的大廳…大堂裡空空如是,有的只是圓圓的天花和地上舖著的瑰紅地氈,牆壁上盡是陰暗隔音圖案花紋…身處如斯幽閉深闊的空間,零星的燭火如銀河星閃….會否令自己覺悟身如宇宙微塵,煩惱亦
如煙如露如電…在世間和時間中一刹那的匆勿存在過呢??…

Posted in: 隨心, 生活 |
回應(4) | 回應的RSS | 暫時未有引用通告| (0)

冬夢

2005年12月27日

…月色迷濛,四野暗昏…

風過處,群綠微顫,草香四溢…
原野孤身…我窺月,月照我…

風再起,魂醒,殘夢牽…
入夢…遠紅塵,無俗務…
馥香飄飄,耳畔鶯音…
環抱纖腰,忱妳胸懷,酣睡…

風復來,乍醒…餘温猶在,夢乎…?

風過處,我願此身隨風去…

Posted in: 隨心, 戀愛, 寫作 |
按此回應 | 回應的RSS | 暫時未有引用通告| (0)

粉皮同粉腸

今日悶悶哋,路過一檔金魚鋪….痕痕癢癢又無無聊聊咁走埋去望吓啲金魚…,赫然發現金魚群中有四隻眼仔啤住我(其實係我啤佢哋先,不過辦吓有緣咁款),可能呢兩條魚未見過靚仔….既然咁有緣(冷笑中)橫掂又呢排心情唔多靚想週圍有啲生氣,於是我就只花咗十個大洋就帶咗佢哋返屋企 - 一條叫’粉皮’,一條叫’粉腸’,係我用咗我十幾年受咗高深教育嘅中文程度去幫佢哋諗嘅,改完都覺得非常師氣…..

呀粉皮一如其名,懶到成塊皮咁,郁得好少,又游(應該係沉)得好貼個魚缸底,專長係等啲魚糧漂入佢個咀度….呀粉腸佢亦都係一如其名,成條腸咁兩頭唧,係咁遊,通處遊,好似遊埋呀粉皮嗰份咁….仲食埋佢嗰份tim….專長係上水面玩口水波,好過癮….

靜靜睇著呢對金燦燦嘅海鮮游嚟游去,真係覺得好得意(自己成廿幾年冇再養過小動物)好奇妙….又諗,呢一對小小嘅生命,以人力肯定無法製造,但點解可以以5蚊呢個咁低賤嘅價錢去評定佢嘅價值呢?? 但係調番轉頭又唔可以用5蚊去造番條生命喎…..唉,都唔知自己up咩,都係餵魚糧先,費事餓親呀粉皮同粉腸….

Posted in: 隨心 |
按此回應 | 回應的RSS | 暫時未有引用通告| (0)

愛情multiple choice(男)

A. 結咗婚嘅男人話:’結婚好!?有咩好!要養家養老婆仔女,又要供樓供車供書教學,只可以死唔可以病(唔准病)….兼且無自由失自由…,返夜啲飲吓嘢,隻乸都緝私咁緝,…份糧俾遲啲,又問….日哦夜哦….煩…都係拍拖時最好…’

B. 拍緊拖嘅男人話:’拍拖好!?有咩好!一日幾廿個追魂CALL,’痴’身到暈…,同其他女好傾啲呀,想攪’劈腿’想撇佢呀,條女就又喊生又喊死…..唉,其實呢家條女咁又唔係太差,不過行咗咁耐有啲悶,想溝多啲其他女睇吓邊個啱自己啫…都係單身好…’

C. 單身嘅男人話:’單身好!?有咩好!過時過節得自己一條’冷’,想去旅行又冇人陪,食親飯又要搭枱….睇見人哋一雙一對….唉,都係結咗婚好,有個温暖嘅家,番到屋企熱茶熱飯,推襟送暖…俾人管?俾人煩?喂,我呢家想呀,有咩所謂唧…唉,都係結婚好….’

各位仔仔(包括我),what ’s yr choice??

Posted in: 愛情, 隨心 |
按此回應 | 回應的RSS | 暫時未有引用通告| (0)

天真!?

2005年12月24日

今午在一茶餐廳吃飯. 剛巧,新聞正報告一個上年因南亞海嘯而失去母親的泰國小女孩的概況;透過翻譯說,她至今情緒仍然低落,不時一想起已罹難的母親就難過悲哭…

在鄰座有一個小女孩也和她年輕的母親一起留心的看著這段報導;我留意到這個小女孩也大概也只有四,五歲的年紀,但卻像很明白很懂事的,問她的媽媽說:’媽媽,可唔可以

今晚同聖誕老人伯伯講俾番個媽媽俾個姐姐呀? 佢喺度喊呀….’ 她母親即時啞口無言,

只說:’呀…….應該可以o掛……快啲食埋碟粉粉佢走嘞……’

赤子的天真!!! 對於這個年少無知的問題,對大人來說答案是顯而易見….但那一刻我被

她的慈悲也感動得希望可以向聖誕老人討個一樣願望的禮物…….

聖誕老人,可以嗎?

我也天真嗎!?

Posted in: 日記, 生活, 隨心 |
按此回應 | 回應的RSS | 暫時未有引用通告| (1)

一日,食飽飽後與同事閒聊,講開有咩漫畫係我哋認為係經典必睇嘅,都諗咗好耐,大家都愈講愈投入….
以下是自己心水選擇(排名不分先後,因為實在分唔到先後….):

1) 鉄拳浪子
- 睇完佢似真還假嘅情節,先令我明白打拳啲人減磅係咁痛苦嘅!! 呢套嘢熱血到不得了,明場面多得很,打死力石徹,挑戰卡洛士,到最後死戰荷西都非常震撼;不過最感人係葉子向矢吹愛的表白到睇住自己心愛男人奮戰而死,劇情舖排甚有電影感…此乃歸功於已故原作者高森朝雄(其實係一名電影導演兼編劇); 當然主角矢吹似熱血但痴線嘅’燃燒自己至雪白的灰’嘅理念,到呢家喺日本係名句嚟嫁!

2) 男兒當入樽
- 佢嘅吸引力所在係將一班連籃球都少打嘅人都鍾意追佢! 公仔靚,非一般情節,主要角色又攪笑又可愛,啲Q版人又趣緻….不過就唔知點解套嘢咁短命…可能太早對山王嘞…;不時謠傳會有續集,不過都講到櫻木佢哋佢哋部分人都唔喺高中,咁點先可以再一齊
呢?

3) 龍珠
- 可以話係鳥山明顛峰之作,最正係佢有諗頭到將諧趣打鬥嘅前半部,突然嚟個一百八十度轉變做全格鬥暴力橋段,無端端話悟空係外星人開始之後就極收旺場….再嚟個傳說金毛撒亞人又將劇情推向另一高峰…雖然好多人都話斯路之後應該摺埋唔好再流入千篇一律之途,但追開由小學到自己讀大學,始終係情意結,要睇到佢結局為止…

4) 怪醫秦博士
- 一套有深度而有實際醫學理論嘅非一般漫畫. 描寫一個因脾氣行為古怪不為大眾所接受嘅非法外科醫生,憑住佢高超醫術,行仁俠之心之餘,仲揭露人性真實一面….對於自己o靚仔時睇開嗰啲咩無敵英雄機械打鬥,正義一方簡直係萬能天下無敵,例必勝邪嘅橋段,去睇呢套漫畫時有著非常唔同feeling,裡面帶出個訊息係人力始終有限,未必鬥得過天;連秦博士都有醫唔好要死嘅病人(包括佢恩師),並非無敵;最印象深係佢曾經仰天高呼:’既然世上有醫唔好嘅病,咁有醫生喺處又有咩用吖!’…醫者之言,真係好感動….

5) 北斗之拳
- 超熱血漫畫!開創超暴力紙上視覺效果,爆腦裂肚,斷手爛腳,初頭睇到目定口呆,之後睇到拍案叫….叫絶呀!主角健次郎型到爆,功夫打鬥就抄李小龍,後期造型就跟史太龍(但條眉仍然係厚到好似兩塊紫菜咁款)….佢大佬雷奧二佬多其同佢之間爭奪北斗掌門人橋段係全書最精采嘅!’你已經死了’是全書名句….但反而最後一期最尾嗰幾頁所講嘅’我的墓碑不要刻名字…要死都戰死在荒野…’,嘩,cool到pk~!

6) TOUCH
- 我覺得係安達充係列最好睇最動人嘅. 其實初頭自己唔係咁鍾意啲公仔,覺得好女仔吓,不過睇真啲係好抵死好惹笑,成日都有啲回饋讀者嘅女仔除衫性感場面,但又點到即止,真係俾佢吊癮…達也,和也同小南嘅關係係全書最惹人関心的…直至和也俾車突然撞死(真係冇諗過會咁安排)將成個故事推向頂峰及明朗化….好有劇情同笑中有淚…個鬼教練亦係全書轉捩點人物,佢嘅出現真係太正!

7) 龍虎門
- 土產武打公仔書之皇!試問邊個唔識王小虎,電光毒龍鑽,冰火五重天呀!嘻嘻…可以講玉郎將金庸小說裡面嘅武功實體兼實戰化…細細個時真係睇到郁手郁腳..又話自己係咩邪神呀咩聖上呀…..又話自己咩易筋經黑級,識咩九陽五絶,又學小虎練九陽神功時啲古怪姿勢…真係勝在長睇長有,經典人物夠多,忠奸分明,兼啲武功招式啷啷上口…雖然睇到天下無敵老祖宗已經覺得爛尾無再追,但聽到玉郎出返嚟重寫又忍唔住睇番,吸引力何其大呢!但其實咩叫做’螳螂問心圈’呢(螳螂都識問心)?點解又有’火雲鐵桶’??係邊處有得買呢個桶呢???

8) 叮噹
- 唔洗多講,歷久不需,陪住我哋大…雖然情節係千篇一律,但就係鍾意佢千篇一律;最深印象係謠傳叮噹完結,最後一篇連載係講大雄原來係個自閉症細路,咩叮噹呀都完全係佢幻想出嚟….雖然後來知道係假,但都為此心痛好一陣子…

9) 老夫子
- 又係唔多洗講,華人之寳,香港殿堂級漫畫,睇到大;睇咗佢你唔會唔笑,又唔多字公仔又靚,本本都俾啲細路仔揭到爛;到大個咗呢家再睇番,原來好多故仔都係幾有深度,大人睇都覺得有意思有代入感!

10) 聖鬥士星矢
- 更加唔洗講,呢套嘢簡直瘋癲萬千少年!!好配服車田正美咁q有諗頭,將浪漫嘅星座傳說發展到可以著上身嘅聖衣!!仲要設計得鬼咁有美感咁靚!! 最經典莫過於黃道十二宮所有黃金聖鬥士…..不過我意見吖,最好睇始終係十二宮篇同銀河擂台篇….夠神秘同新鮮感重嘛.

其實最近漫畫如,二十世紀少年,NARUTO火影忍者,犬夜叉,KERORO….可觀性其高,不過始終都唔夠呢十本咁好睇同震撼人心.

Posted in: 隨心, 消閒/嗜好, 動畫與漫畫 |
回應(6) | 回應的RSS | 引用通告(1)| (2)

我的一條白頭髮

2005年12月22日

某日,氣冲冲趕上班之際,想著只是望鏡一眼看看儀容尚可便’暴走’上路…..誰知, 眼角一瞟,才發現於云云烏髮之中竟有一條非常亮眼的純白髮絲冒了出來,實在惹我留意…..
這匆匆一瞥令我這個卅出頭仍被冠以’童顏王子’的人,帶著一股不是味兒的感覺極速上班…..
回到公司,細心察看,終於查出真凶,兼且更趕出’同黨’ - 另一條比較短但依然雪白得像米粉的白髮也在不遠處,兩條賭氣的一左一右的豎起來,活像天線低低B般的模樣….再仔細點看看鏡中的那個面容,也許外人覺得自己’童顏依舊’(其實自己也不否認,也不肯定如果現在穿上校服混在中學生堆中,亞sir或miss會否驚訝有新插班生;又或者放飯時披上校服到茶餐廳可不可能仍得到’學生半價’優惠云云…),但自己已驟覺眉宇間的稚氣和年少時的朝氣,經歲月的冲刷和經驗的磨練,褪去了十之八九,留下的只有幾分餘印…

也許從沒想過自己跟白頭髮有啥任何關係…就像當年自己無知的十八歲時絶沒想到什麼’三張幾嘢’,什麼’十年之後我是啥模樣’,什麼叫’經濟負担’云云….但到現在的我懂得想

什麼’十年之後我是啥模樣’,卻又盡量避免去想,你看是多麼他媽的茅盾!!!

居然,只為了一條半條的白頭髮,竟令我呆立廁所鏡前’思前想後’….差點連大解都忘了!!

…年青時不覺青春流逝,也不曉珍惜青春,到醒覺時方知歲月不返,欲追無從…或許人生就是如此….如此’抵死’