火一般的鬥志

2005年12月31日

由細睇唔少笑片,大個咗先知原來啲橋段係嚟自我哋身邊週圍嘅事…

尋日就見到一個真人真事,活生生血淋淋嘅實例……實在令我忍俊不禁….

***

去咗屋企附近間茶餐廳食個平靜嘅T. 食到一半左右,一對情侣手拖手入嚟….男嘅好高好瘦有啲似嗰個阿rain,眼矇矇,但黑啲………個女嘅就比男嘅矮一個頭,打橫係個男嘅1.5倍到,身材略為豐滿(豐滿程度只係去到佢行過我張枱時,我覺得個階磚地有啲震咁啫,同埋我估以我呢家嘅体魄應該受唔到佢一拳)…由於佢哋坐喺我極近嘅一張圓枱,佢哋講嘅甜言蜜語唔想聽監硬都要聽…當佢哋落咗單叫嘢食,就有以下一段節錄咗嘅對話:

***

男:’又叫菠蘿油食,仲要紅荳冰咁甜,肥死你呀,又話會為我減肥嘅!?….’

女:’都唔係好多嘢啫,咁人哋想食吖嘛….,你係咪唔想俾人食吖(略帶嬲)…’用手輕輕撞咗個男個心口一吓’呢家人哋好肥好難睇咩!(略帶o爹)’

男:’難咩睇唧,直頭靚過欣宜啦(唔係講笑,佢真係咁講…震….汗….),人哋唔係咁意思,不過會同我更加襯啲同著衫都sexy啲啦…咁啦,食少啲啲買多幾個LV bag bag 過你吖..衰豬…’說話同時隻手攬住女腰,塊面貼住女面,喺佢哋對面嘅我開始有啲頂唔順,喉頭有啲感覺到胃入面嘅炸菜肉絲米開始湧上嚟….

女:’嘢….你死呀你,你唔驚我俾人睇蝕咩…嘻嘻’

之後一輪約三四分鐘連續不停嘅打情罵俏肉麻骨痺嬉笑說話聲喺兩個連体嬰一對嘅頭傳嚟….(我唔想recall返出嚟,講唔出,下刪百九幾字…)

男:’….嗱,咁你應承我囉喎,要keep fit 呀….’

個女聽咗之後,突然靜咗一靜,一搥擂向玻璃枱面,望向遠方,眼神閃爍而堅定,剎那間好似有火一般嘅鬥志,仲好似好多嘢諗緊咁樣….轉頭望向個男度…

男:’啱嘞啱嘞,俾啲決心啦,以後食少啲啦,o鍚哂你,嘻嘻….’

女:’死嘢呀,漏咗叫個炸脾薯條呀….呀,唔該,伙記,俾多個炸脾薯條吖…’

真係為之絶倒!! 十足電影啲gag!

Posted in: 隨心 |
回應(1) | 回應的RSS | 暫時未有引用通告| (0)