童顏懼雨

（以下含成年人句語，毋需家長陪同收看,敬請家長留意）

時間：今日午飯

地點：一條比較窄的行人道

人物：

（１）小弟

（２）迎面一個一抽二袋嘅大肚女士,只能用手指尾僅僅拖著個一兩歲行到左

　　　搖右擺嘅bb.佢放前咗少少

（３）我隔籬係一個担著牙簽嘅地盤亞叔

（４）一撮似學生嘅物体，個個高高大，啲頭染到五顏六色，男嘅條褲差唔

　　　多隨時會甩，啲校呔（？）似啱啱蒸完嘅梅菜；女嘅啲裙短過我條媽

　　　煙通，化’行’粧；本來喺我身後面，之後迅速標喺我同亞叔前面

事發經過：

人物（４）喺條街不停講粗口（女嘅至為爛口，老母前老母後，認真孝順，阿彌陀佛．．．），高聲嬉笑，互相推撞，旁若無人，途人側哂目；我一路觀察佢哋，心裡面正用佢哋講緊嘅粗口鬧番佢哋．．．終於出事，有個箭豬頭嘅衰仔為咗避另外個女嘅追扑，一tun向旁撞到佢哋唔留意嘅人物（２）bb,眼見個bb喺我眼前好快會向馬路級邊嘅渠邊污水跌落去，我一手（腎上腺素急劇上昇，動作比平時快幾倍）捉住bb隻左手仔，同一時間另外有隻粗大嘅手兜著bb嘅右邊身仔；兩個動作足夠遏止咗bb嘅跌勢，扶番正，好彩！！．．．正當我望吓隻手係邊個嘅時候，一把粗獷沙啞嘅”佬”聲正正喺我耳邊大喝：’XX老味，你班X街，撞到人嘞！（我嗰刻以為自己會聾）’．．．個箭豬頭衰仔唔知衰仲不肖咁講：’o車，撞到吓啫都冇事，洗唔洗呀．．．’我聽咗已經咬牙切齒，地盤亞叔搶先喝佢：’係咪要碌出馬路撞X死咗先叫有事呀！？吓！？’成班人物（４）於是用9秒9急速鼠竄離開現場．．．我個人覺得阿叔嗰時講嘅唔係粗口，係一啲用嚟降魔服妖嘅呪文．．．位bb媽咪猛咁向阿叔同我道謝，而我就雙眼發亮伸出拇指向亞叔講咗句：’阿叔，你好嘢．．．(我隻耳好痛呀．．嗚．．)’阿叔就餘氣未消唸唸有詞：’仆X,呢家啲學生真係＄＃＠％＾＆＾％（＆＾）（！＾．．．’之後聽到個bb終於識喊．．．

***

後記：望住地盤阿叔遠去嘅背影，我心存敬佩．我敬佩佢嘅胆色同不平鳴；雖然嗰一刻我內心嘅正義曾經脫籠咆哮，但我會唔會好似亞叔咁毫不猶疑即刻發難，我唔知．．．年少氣盛時嘅我，肯定會．．．甚至會講手都唔出奇；反而出嚟社會做事嘅我，識見多咗，個人沉著咗，理性每每比感性行先一步．．．好耶？壞耶？

再望向愈走愈遠嘅阿叔，咁似望到一個幪面超人V3嘅背影嘅?．．．唔通我眼花，定係佢真係．．．！？