童顏懼雨

上星期五傍晚約了’麻甩幫’死黨兩人一齊做節吃飯團年. 由於早到於是便喺佐敦到處蹓躂. 突然間聽到有把熟悉女聲叫著我….’阿撈, 阿撈’…於是乎下意識轉頭一LOOK…嘩:眼前係一位化了薄粧,套裝裙,長髮飄飄,樣子清秀的女孩子….印象中沒有認識類似的靚女,但把聲卻好鬼熟落….於是露出個呆呆嘅笨樣,而個腦就以PS2 LOAD 碟嘅速度去MAP番佢個靚女樣同人名出嚟…..’唔係化,佢應該係….’…..’喂,文慧呀,死嘞又有人唔認得我tim…又要解釋’…

簡直係眼前一亮! 以前我識嗰個青梅竹馬嘅文慧係個’童顏王國子民’,唔化粧,短頭髮,肥肥潤潤,衣著好casual嘅女仔;冇見半年,家下真係幪面超人變身…..驚嚇!…..原來佢喺大半年前同前男友分手,之後就振奮起嚟,密謀作出改變….,先去個旅行,之後減肥(佢話餐前食個生果整飽自己,再加做運動,咁就冇咗十磅!),執番正自己,買番啲靚衫,留番長啲頭髮仲做個負離子…..於是就變成咗呢家我眼前面仔尖尖,減肥後嘅索女….睇到我都有啲心動….

‘我以為你幫襯咗咩瑪花呢…嘻…’我開玩笑講.

‘梗係唔係啦,好辛苦自己減o架…仲慘過分手…’睇得出佢有啲無奈.

‘算啦,呢家嘢真要分嘅,就好似徒手捉生魚咁,捉唔實,留唔低…咁呢家你個樣咁無敵,應該大把人追,條龍排到水蛇春咁長囉喎..’

‘…嘻…四正咗啲啦(自滿中)…真係好神奇呀,突然多咗啲啦,可能會開始拍番拖…,你呢?’

‘我!仲係流浪貓流浪狗冇人要呀…..我又唔似你曉變身,就算變極都係咁嘅薯款啦…’我苦笑.

‘咦,唔似喎,你把口咁甜,又咁好仔,你眼角高啫…’我再苦笑…

再寒暄多一陣,彼此都要赴約於是相約電話再傾;臨走前佢狡黠一笑:’如果再冇人要,我啃咗佢嘞….’’嘻,客乜氣吖…’講完佢同我都忍唔住大笑….由細玩到大,彼此都係大唔透,講笑冇咩底線….

呢家諗番,千祈唔好睇小身邊任何一個曾被看扁嘅女仔….一個蛹變蝴蝶,真係唔好講笑. 不過拍拖呢家嘢,唔可以只係用個外表衡量(當然每個人心目中都有把尺…我唔可能接受一個成龍樣嘅女仔)…人會老樣會變,最緊要係夾得來,溝通得到,同互相欣賞大家嘅内在美….

喺呢度我祝福文慧新嘅戀情能夠開花結果.