配眼鏡記

2006年04月25日

自己名副其實”四眼仔佬”一名. 由細戴眼鏡戴到大,小學尾已經開始眼矇矇(可能嗰時讀書勤力,都考第二o架年年,仲越級溝識到件班花,幾勁

),但係俾老媽子寃枉我見人家戴眼鏡,自己又想戴斯文先講大話. 到咗上中學冇幾耐己經頂唔順,隻眼咪到成條線咁滯,條頸伸到盡向前睇黑板,好似'夾'女人裙底咁款,個樣極為鹹濕,攪到啲女書友怕哂我,無奈! 伸冤呀! 包大人….

***

於是就咁開始咗四眼龜生涯嘞. 以前啲鏡框,有咁大得咁死大,又方,戴咗成個X-men嗰個cyclops咁樣樣,以為隨時會發射死光;色又核鬼突,咩玳瑁色呀,一係就啡到似拔蘭地,自己近視都頗深,啲圈圈多到好似萬花茼咁,勁似densha otaku,電車男; 都唔明嗰時自己個腦諗乜,審美眼光簡直超然,如果今時今日用嚟揀女朋友,就真係要即刻嚟杯大檸樂. 隨著年紀長大,眼鏡框同鏡片嘅size就愈變愈細(好似講緊啲流行三點式咁,愈嚟愈少布,

),愈接近眼睛外形. 黑色,鋼鉄色,金色(俗氣到呢),無框,合金框,成吋厚膠鏡,玻璃鏡,纖維鏡,到呢家銀色鈦金屬超輕量彈弓臂橢圓形框+超薄纖維鏡(淨係個名都夠勁夠無敵夠cyber嘞呱),自己呢個眼鏡組合係最令人滿意. 呢個組合亦都係最少青苔生嘅.以前啲膠鏡框,坑位多,易藏垢,汗水多時最易養啲寵物青苔,攪到鏡片青bb,諗起都幾恐怖.

***

最近有感太耐冇驗眼,又有啲心思思同痕癢想換款,想試吓呢家興嗰啲笨實粗邊黑膠眶. 於是走去驗眼先,然後試吓啲框…..測試結果係左眼-25近視但+25 散光. 個視光師阿叔以極專家嘅差佬口吻同我講:'你有權選擇配過對新嘅,又或者保持keep住呢對…'可能佢睇得多警匪片,幾驚佢講完攞對孖葉'搭'我返差館. 咁配唔配就取決於個框啱唔啱心水,吸唔吸引倒小弟….叫個sales靚姐姐麻煩佢拎幾副笨實鏡俾我試試. 我睇咗一輪,拎起副個款係最笨實嘅戴上面,向鏡一睇…………'而咦,唔掂!實在太笨實!'自己實在忍唔住口吐惡言,當望見鏡入面嗰副尊容. 個靚姐姐突然'嗤'一聲爆笑出嚟,唔好意思咁跟住掩住個小咀….本身小弟個樣已經夠實吓實吓,再加埋呢副地上最強笨實黑膠長方形鏡框,簡直係(笨實)²! 我驚出到老旺會俾人tum..