難得機會

2006年05月01日

某個賽馬日電台直播,聽到一段頗為令人發噱對話,發生喺某一場賽事宣佈派彩之後…..

***

講馬佬1號 : “吖,呢個萬誠(騎師)吖,唔應該贏嗰啲佢就跑出,應贏嗰啲又唔見咗影………攪乜呀,唉,咁就俾佢斷咗條飛,真係(有啲慶慶哋)…….”

講馬佬2號 : “咪就係…..真係呢,呢個萬誠人仔矮矮,令舍多計,有啲蠱蠱惑惑,哈哈(假笑)”

講馬佬1號 : “真呀,佢五呎爭兩寸,都幾矮吓,成個細路咁樣,可以去快餐店食個兒童餐都冇人話佢,哈哈”

講馬佬2號 : “兒童餐!? 係呀,仲可以攞埋個氣球o忝,哈哈哈哈哈哈(放聲大笑)…”

講馬佬1號 : “咁咪好正? 哈哈哈哈哈哈(又跟住放聲大笑)…”

***

之後,我聽到佢哋突然咁唔客氣咁狠狠哋踐個身材得四呎十~十一吋嘅騎師,都忍唔住爆笑出嚟. 實在又潤得既應又賤. 我心諗,唔知係咪受得以前殖民地時代俾英國佬'恰'得多,個個鬼佬見親都神高神大,件件丈八咁高,同佢哋講嘢都要頭岳岳,頸都梗埋; 難得見個鬼佬生得咁鬼矮,又累街坊輸馬,於是有咁多腳得咁重腳係咁踐個'小'騎師,揶揄一鑊甘一甘,發洩心頭之氣…..個騎師應該唔識廣東話,如果唔係又咁啱俾佢聽到,真係激到嘔,頂哂肺,潤到上心口. 或者都未必嘅,可能萬誠真係好鍾意食兒童餐,貪佢有啲得意玩具換,又有氣球攞,聽到佢哋咁講,唔止得啖笑,仲大嘆:'知我者莫若君也',轉頭請佢哋食兩個兒童餐o忝,嘻嘻