燦惑 - 童顏懼雨

燦惑

2006年05月07日

記得好耐以前有個朋友個仔,七八歳人仔好鬼曳好鬼UN皮,WE-WE-WA-WA由朝嘈到晚,令人煩肺,我嗰時都幾鬼討厭呢個面目可憎嘅死o靚仔.

有次成班人去赤柱嗰頭玩燒烤,由於我唔太熱衷燒嘢食(嫌煩冇耐性,對住個火慶到成身汗鬼咁餓先得嗰丁點嘢食,唔合我嘅急性子….如果燒俾人食我都ok,自己食嘅話燒兩叉就投降

),反而對海浪聲同睇星星有興趣啲. 於是走埋一處咬住條腸頭岳岳望吓天.

個o靚仔可能玩得攰,居然走埋嚟挨住我坐,又學我頭岳岳望住個黑mum mum嘅天. 我記得我冇出聲,費事理佢,咪惹到佢嘈嘈閉,破壞我心情同氣氛.

***

佢突然好正經好細聲問我:'哥哥,點解啲咁光嘅星星淨係夜晚先出嚟嘅?'

我好驚奇佢會問啲咁科學同哲理性嘅問題,我答:'佢哋不嬲都喺處,不過朝早有太陽照住,啲陽光蓋過哂啲星光,咁咪睇唔到囉.'

佢突然好似好佩服我識啲咁嘢,問我:'嘩,哥哥咁叻嘅,點知道o架?'

我答:'睇課外書囉,去圖書館囉!'

佢點吓點吓個酸薑轎,好似好明白:'哦,我都有個圖書証,我聽日都去睇書先'

之後一大一少就無聲出兩條友仔一齊觀星(嗰時光害較少,個天好清,我好記得). 我仲話俾過佢知邊粒係天蝎座心宿二紅星,特別靚.

***

之後佢個o靚仔成家移民咗去美國. 冇聯絡好耐好耐. 喺今年年頭,喺一個非常轉折嘅情況下我收到一張明信片,上面冇郵戳,只係寫咗句:'xx哥哥,I can still remember that night, and the red star.' 原來係朋友個仔返嚟香港幾日,記得起我呢個人,托人寫嚟問候我.

我睇咗好感動…好想同佢講:'buddy,me too, I won't forget that night, and the red star forever'.

喺呢度,我祝福佢就嚟喺美國三藩市某大學畢業. Best wishes to u, guy.