先 甜 後 ”虎”
2006年06月07日今日與一位做sales的朋友食晏，他叫做亞平。
平：”哈，同你食飯真開心，乜都傾得，乜都傾餐飽，你條友仔又夠賤．．．呢餐飯先叫做真係食得安樂咯．．．”
我：”做咩平時食飯好似食黃蓮咁辛苦、好唔安樂嘅咩，有人食飯時攪你pet pet 呀？”
平：”唔係呀，賤仔．．．係呢排公司準備裁員，個個食飯都喺度勁吐苦水，猛咁呻，就算我唔呻埋一份只係一路聽住食飯都冇胃口冇心情啦，都唔知下個係邊個，會唔會係我．．．我嗰Team個大老細，以前同你提過嘅叫Tim MA,正一笑面虎，仆街一名，上個禮拜頭，無情情請成組人去飲茶食飯，懶好傾，懶so-so，又問我哋除咗做嘢之外有咩大計、有咩其他嘢攪．．．嗰餐佢俾錢請，我哋成Team人都好意外同有啲覺得唔妥，但係千幾年先會自動請纓一次，梗係多謝先啦．．．點知第二朝早就收到佢Email話上頭會喺我嗰Team同隔籬兩Team處揀人layoff喎，而且三Team老細入面以佢最話得事去操生殺大權云云．．．之後嗰日下午，聽到隔籬組有兩個男同事俾佢暗中以’猛虎出柙’之勢嗱嗱林o鋸咗．．．聽講遲啲會郁多幾條友，合併成兩Team，大檸樂嘞今鑊．．．”
我：”唉，阿平，唔好太愁嘞．．．都唔係你話事，點愁都愁唔嚟啦，唯有聽天由命啦．．．唉，係賤命呀我哋．．．”
平：”平時我又唔托，又唔’瀨’，又唔賣口乖，實唔夠班擦鞋友咁定過枱油啦，據講其中有一兩條最擦得嘅會升呀．．．．唔憂就呃你嘅啫，阿撈．．．呢家結婚都要tun遲呀，PK．．．”
我：”兒．．．咦．．．．條粉腸叫Tim MA,又有權．．．．咁唔係叫’Tim MA留升權’（天馬流星拳）仲係咩呀，吓？哈哈哈哈”
平：”嘩，係喎，咁都俾你諗到，哈哈哈哈，你估佢係星矢咩，佢係奸到出汁嗰個教皇咋，留升權，我*&^^%%$%# 老!(*^&味＄％＾％．．．．’
歡笑聲中彼此作別。其實，我不懂如何去安慰阿平，減輕他的苦惱，除了深表同情，說多幾句笑話，什麼也做不上．．．
不時聽說這幾年香港經濟好、公司賺錢，但知否那些營利不一定是真正淨賺回來，而是靠裁員閂減這條大開支數，支出省，少了負數字，相對整盤帳面數就如多賺了，但是賠上的卻是無數人的飯碗和安定生活，真真正正如曾志偉在無間道裡所說的’一將功成萬骨枯’。其不哀乎！
Posted in: 生活, 朋友, 日記 |
回應(13) | 回應的RSS | 暫時未有引用通告| 
(0)
