十 皮 行 書 展
2006年07月22日書展由九二年開始去,年年都去一淌先心息. 年年多人,迫到出汁,口雖埋怨,但又唔捨得唔去,廿皮行餐懵,樂此不疲.
今日放工,走咗去試咗第一次十皮仲要近挨晚行書展,真係咁多年第一次. 己經六點過啲啲行到去中環廣場,點知己經見到有差人叔叔同啲漸成形嘅人龍,開始塞塞哋車. 好在,有人龍但係人都算疏落,我乘著啲人之間嘅空隙嗱嗱林用'綾波微步'快速向住會展方向前行….一路都有人加入大隊,人氣加天氣,熱到我溶咁滯,入到場涼到冷氣先至有番啲神志,目光無咁散渙. 場裡面真係好多人,我除咗要害之外,週身都俾人非禮過哂,如果係女就蝕到仆街嘞.
我集中火力行HALL 1. 初頭其實都好多人,有老有嫩,咩年紀咩性別自由行,又學生哥打工仔,個個都好鬼踴躍,見到啲花花碌嘅各式書本就眼都發哂青光,一時間書卷味好似蝦膏炒菜咁惹味,引死人. 今年啲大陸書真係多咗好多檔,書種又多,印刷又精美,最緊要價錢平到你睇見會'嘩'一聲叫出來…有啲連香港都冇嘅書,如蚊型本老夫子呀,咩畫集呀,咩畫冊呀,好鬼正;同埋有啲出名嘅書喺香港賣得貴,字大大隻空位又多,好多人望到都卻步….啲大陸譯本就有同樣質素,只要你肯睇同識睇簡体字,四分一價錢可以帶番屋企….啲大大本硬皮百科叢書,紙質唔錯,斤両十足,大可作收藏之用. 所以好多人圍住係咁左翻右巢. 不過嗰幾間本港最出名嘅出版社都係水洩不通,大把人爭住排隊俾錢. 其中有一間有句口號黐住喺個CASHIER隔籬,寫住'…..知識就是力量…..'..我睇見就諗,成檔口都係書,本本都係知識,本本都咁賣錢,呢啲就係真真正正嘅力量,係賺你錢嘅力量,係令你俾錢佢嘅力量.
今年行書展有啲幾特別,見到三個名人. 喺一個場中間嘅書檔,見到商台人氣節目'光明頂'前主持兼現任特首顧問劉細良先生. 劉生一度街坊裝幫手派傳單,四十出頭,但望上去個樣似三十幾,但係就有個肥肚腩,好cute. 正當我凝神確定佢係劉生時,一旁閃出'光明頂'監制兼'十八樓C座'飾演拉表叔兼TOYSDAILY榮譽同好馮志豐大大, 向劉生熟落攀談問候. 睇見佢個樣,就諗起細個時睇佢,喺周潤發,劉德華同苗喬偉做嘅'蘇乞兒'入面做嗰個叫'初九'嘅細路仔,好cute好精靈…呢家鬍鬚勒突,MAN到震. 另外一位係叫蔡子強,係城大定理大學者,有時新聞報導會訪問佢.
唔知點解愈夜反而人好似冇咁多,冇咁迫,空間多咗,行得好舒服….我行咁多年書展志在感染吓個氣氛,所以我都盡量都唔會擠入去太多人圍嘅書檔,只係望一兩眼冇咩特別就閃開,有新嘢得意嘢嘅就揭一陣,啱就即刻科水….其實都唔一定喺書展買咁多嘢嘅,因為書展之後啲書店實有同樣貨賣,迫嚟簡直嘥力嘥氣,平時啲書局又有折,相差唔多. 啲人仲抽個拉篋去掃貨,攞嚟辛苦,仲好鬼危險,人多時唔小心有人一腳踐上去就骨牌咁跌到,人踐人大大鑊. 有啲書年年都出同一個版,連個擺位DISPLAY位都年年一樣,真係一睇個出版社個檔位喺邊就可以BYPASS慳番啲時間,無謂傷神同腳力.
優優悠悠咁一支公聽住MP3隨意行咗兩粒幾鐘,好寫意. 對腳因為著皮鞋関係,不停行始終係痠,於是就例牌每年咁去'天地'買咗兩本蔡瀾嘅'五趣也'同'六趣也',走人去也…..睇吓個錶,都近九點嘞. 十蚊兜有咁舒服嘅節目,真係超值,帶著滿足嘅心情,開開心心撇人
,書展下年再會.
,書展下年再會.Posted in: 日記, 生活, 隨心 |
回應(4) | 回應的RSS | 暫時未有引用通告| 
(0)
2006 七月 22 at 1:26 am 我94年開始去嘅，年年都迫餐傻...雖然係咁，但又會好攞苦黎辛又人甘情願咁樂在其中。
睇黎行夜市都唔錯喎，有機會我都試下先!
2006 七月 22 at 10:01 am 我果日就見到梁文道，如果有得選擇，會比較喜歡見到劉世良囉。XD
其實昨晚我原本是去聽"金庸與讀者座談會"的，在網上已book了位，但太多人了，從地鐵站的天橋行去，要D人先兜去華潤，再兜去會展，我行到去華潤之前的天橋就行返落o黎，實在好怕咁多人。
2006 七月 22 at 11:46 am 我星期四晚去都係迫餐死,反而入到場館就無咁多人...
除了蔡瀾,仲有無買其它書??
2006 七月 22 at 10:27 pm Re Snowheart, 哈哈,冇喇,淨係係咁意買咗兩本蔡生嘅書咋,因為啲書出面書局有得賣,冇謂迫自己去辦年貨咁一抽二袋先滿足到購物慾.....啲精品我又冇乜太大興趣,我其實係享受行個過程多過想買啲乜,咁你又有冇買啲咩呀?^^
Re Kaori, 十零廿蚊消磨幾粒鐘,又有得同人逼吓,抵吖.
Re 小O, 你有人氣恐懼証?