午市搶客得啖笑

2006年09月08日

番工咁辛苦，放飯食餐晏仔舒舒服，有時都唔係咁易．尤其喺啲旺區，啲食肆擺明喺黃金時間嗰一兩個鐘想賺多幾輪客錢，係咁趕呀趕，啲打工仔想吔飽坐定定打個靚躉都唔得．

好似今日我同個同事去間小型茶餐廳食飯，成間爆棚，得張圓枱仔嘅半邊有一個位．．．個喺鋪面勁炒緊飯嘅麻甩老板，唔知佢耳失聰定我哋啲耳仔有問題，同我哋大大聲講／喊：’哩，呢處咪坐得囉～'….嘩,我心諗,阿叔,雖然我哋唔係米芝蓮人,又冇姚明咁高,冇阿諾舒華哈蜜瓜咁大大隻,亦冇丈八咁闊,但係好人好者都係兩個有番咁上下件頭嘅麻甩仔嘛,要兩條友坐到夾哂脾,縮埋一舊好似喺越南難民營咁樣樣,逼到我哋其中一隻匙羮嘅飯都可以互餵,你話係咪有斷背feel先,點攪先呢鑊嘢? 我於是口吐惡言:'點坐呀,我哋話哂都丈幾長吖…'

老板娘跟住就醒水,叫其中一個卡位嘅兩位美麗OL坐埋一邊,招呼咗另一邊(約莫坐到成年人1.5個C忽咁闊)嘅位俾我哋兩條友仔….哎,香港普遍啲餐廳都係有啲咁嘅待客陋習,三九唔識七,打對面咁坐住嚟吔嘢,真係好鬼尶尬,有乜謂呢,隨時目光相觸,四目交投,發生感情. 對住斯文靚女都話飲得杯落吖,我頂,對住啲地盤佬呀,食嘢食到周枱都係嘅麻甩佬呀,又似食豬哨咁o習o習聲,成口都係飯,食到出哂界,真係唔得佢死,叫我點望住佢食落去先,老細. 唔好以為對住啲女就一定好喎,有啲成餐飯一輪咀把咀吹水多過開口吔嘢嘅,又係死,淨係聽見佢哋啲三姑六婆嘢都耳仔won won 聲,有啲仲担起口死人煙,望埋個樣,真係想成碟飯用個漏斗倒入個胃,嗱嗱林撇,恨我個口冇咁大.

嗰兩個OL怕怕醜咁,偷望咗我哋兩眼,有啲避忌同唔自然…我呢啲梗係扮柳下惠,將視線放遠,雙手交叠擺平喺張枱,眼望頭上嘅電視機,成個新聞報導記者方東昇咁嘅戇直款啦,而我個同事就主要係揾痕R,將目夾女嘅注意力分散,咪輕易發生感情同一見傾情. 就喺呢個咁僵硬嘅氣氛,個唔小心嘅小二將美貌OL嘅餐飲錯誤咁放喺我前面(差啲倒落我條褲到,如果真係就唔只一褲都係,仲要滚水淥豬腸嘞呢鋪). 我呢啲梗係打蛇隨棍上啦,就用最真誠嘅眼神同E起棚牙露出親切嘅笑容,十熟狗頭咁樣去將杯得一片檸檬嘅熱檸茶温柔咁還番俾我對面嘅靚女. 一聲軟語'唔該'同一個微笑,就緩和咗個circumstances 嘞.

我哋gentleman二人組等佢哋埋單鬆人之後,即時暴現狼相,將剛到嘅快餐A同C盡快消滅,真係趕到仆街.