灣仔太原街
2006年12月22日今日,食完晏,慣性出巡太原街.
嘩,點零時間,簡直人山人海,插針插唔入嗰隻. 由胡忠大廈嗰邊街尾,途經十字路口街市,再望有金魚檔同化粧品店街口直出,真真寸步難移,逼到個蘿友都歪咁滯.
古玉街邊攤,食蛇店,食麫小舖,大大檔零食露天舖,藥行,時裝店,精品店,玩具鋪,手袋或衫褲鞋襪小販,形形式式,你諗到嘅平民需要,都可以喺呢條幾百米嘅街處揾到……呢條就係其他地方都揾唔到嘅太原街.
尤其呢兩日近聖誕,更加多人喺嗰幾間玩具店買禮物,裝飾品….個個OL,細路入到去,兩眼發光,吱吱喳喳,又話呢個正,又話嗰件搶眼,又話呢款夠Q,熱鬧到不堪,非常有氣氛…..人流出出入入,一抽二袋,鋪面出貨入貨,有笑聲,討論聲,講價聲,喊欄聲,嘈到嘔,不過咁先似樣.
雖然今日巡完灣仔社團都冇咩旬嘢,兩手吉吉咁行番出嚟,但係見到條街咁旺咁人氣高,無論唐人西人,紅男綠女,都好開心行呢條街,市面一片繁榮,個心都好'合皮'.
希望呢條街唔會好似隔離條喜帖街咁俾政府重建同蹂躪,好好咁俾呢條街安安穩穩生存落去;因為街雖係一個實質嘅symbol,但係寄附喺條街嘅嗰種spirit,嗰種民氣,係冇法取締嘅始終…我唔願見到又生多一幢懶唐皇華麗好似好方便就手又高科技同只有名店嘅商場,嗰種冰冷嘅人氣同面孔,係喺呢條街入面完全揾唔到嘅呢.
有時人唔一定乜都要至潮至新至in呢類嘅冷趣味,咁先滿足到生活,要有啲古味,原始味,生活先有啲平衡同真感覺同真体味.
Posted in: 生活, 隨心, 童言瘋語 |
回應(8) | 回應的RSS | 暫時未有引用通告| 
(0)
